Talsvert hefur verið um slys í umdæmi lögreglunnar á Suðurnesjum síðustu daga. Um helgina slasaðist þáttakandi Evrópumótsins í bekkpressu, en mótið fór fram í Reykjanesbæ. Konan sem var að lyfta þegar slysið varð brotnaði á vinstri framhandlegg við úlnlið. Hún var flutt með sjúkrabifreið á bráðamóttöku.

Þá fór ung stúlka úr axlarlið þegar hún var við knattspyrnuiðkun. Þetta kemur fram í tilkynningu frá Lögreglunni á Suðurnesjum.

Ungur drengur slasaðist alvarlega þegar hann datt ofan í gjótu í hrauninu við Bláa lónið um helgina. Hann féll beint fram fyrir sig og ofan í gjótuna. Drengurinn var fluttur með sjúkrabifreið á Heilbrigðisstofnun Suðurnesja.