Feyisa Lilesa, sem varð í 2. sæti í maraþonkeppni Ólympíuleikanna, sendi yfirvöldum í Eþíópíu skýr skilaboð þegar hann kom í mark
Feyisa Lilesa, eþíópískur langhlaupari sem lenti í 2. sæti í maraþonkeppni Ólympíuleikanna í gær, sendi eþíópískum yfirvöldum skýr skilaboð þegar hann kom í mark. Handabendingar hans gætu komið honum í vandræði þegar hann snýr aftur til heimalandsins.
Lilesa setti hendur í kross fyrir ofan höfuð til að sýna fólki af Oromo-þjóðarbrotinu stuðning. Þúsundir einstaklinga af þessu þjóðarbroti hafa verið á hrakhólum síðustu ár eftir að yfirvöld ákváðu að stækka höfuðborg landsins, Addis Ababa, og sölsa þar með undir sig svæði sem Oroma-fólkið býr á. Yfirvöld í Eþíópíu hafa verið sökuð um óhóflega hörku í garð Oroma-fólks af mannréttindasamtökum.
Lilesa sagði eftir hlaupið í gær að margir ættingja hans væru í fangelsi í Eþíópíu. „Ef þú talar um lýðræði ertu drepinn. Ef ég sný aftur til Eþíópíu verð ég mögulega drepinn, eða mér stungið í fangelsi. Ástandið í heimalandi mínu er eldfimt. Kannski þarf ég að setjast að í öðru landi. Ég var að mótmæla frelsisskerðingu fólks, hvar sem það er í heiminum,“ sagði hann.
Þess má þó geta að talsmaður yfirvalda í Eþíópíu sagði við AP-fréttastofuna í dag að ekkert væri hæft í ummælum Lilesa þess efnis að hans biði fangelsisrefsing í Eþíópíu. Þvert á móti yrði vel tekið á móti honum þegar og ef hann kýs að fara aftur til heimalands síns.
Eþíópía hefur um langt skeið verið eitt fátækasta land heims en uppgangur þar hefur samt sem áður verið talsverður á undanförnum árum. Það hefur leitt til meiri eftirspurnar eftir byggingarsvæðum í og við höfðborg landsins sem hefur þýtt að bændur hafa þurft að gera sér að góðu að flytjast búferlum, tilneyddir.