Gunnar Bender segir mannorð sitt svert til langframa
Lögmaður Gunnars Benders hefur sent ritstjórum Fréttatímans, Þóru Tómasdóttur og Gunnari Smára Egilssyni, harðort bréf vegna umfjöllunar blaðsins um meinta tilraun Gunnars og Eggerts Skúla Jóhannessonar til þess að svíkja háar fjárhæðir út úr Ábyrgasjóði launa. Í bréfinu er farið fram á bætur til handa Gunnari og að ummælin verði dregin tilbaka.
Lögmaður Gunnars er Jóhannes S. Ólafsson hjá Impact-lögmönnum. Í bréfi hans til Þóru og Fréttatímans, sem DV hefur undir höndum, er fullyrt að hvorki Ábyrgðasjóður launa né Gísli Davíð Karlsson, lögmaður sjóðsins, vilji kannast við að Gunnar sé grunaður um fjársvik og að slíkt hafi aldrei verið tjáð Þóru eða starfsmönnum Fréttatímans.
Mat lögfræðingsins er á þá leið að umfjöllun blaðsins og hinar meintu ærumeiðingar sem þar koma fram séu alvarleg brot á hegningarlögum sem séu sérstaklega vítaverð í ljósi þess að útbreiðsla Fréttatímans sé mikil. Mannorð Gunnars sé því svert um ókomna tíð. „Umbjóðandi minn er þekktur einstaklingur í íslensku þjóðlífi, meðal annars úr fjölmiðlum, og má því gera ráð fyrir að brotin komi til með að hafa gríðarleg áhrif á líf hans til framtíðar,“ segir Jóhannes.
Í því ljósi er farið fram á bætur að fjárhæð 700 þúsund krónur auk lögfræðikostnaðar sem og að birt verði afsökunarbeiðni í Fréttatímanum þar sem ummælin verða dregin tilbaka og fullyrt að þau séu röng. Þá er einnig farið fram á að fréttin verði annaðhvort fjarlægð af vefnum eða henni breytt með þeim hætti að öll ærumeiðandi ummæli í garð Gunnars verði fjarlægð úr fréttinni.
Þóra og ritstjórn Fréttatímans hafa frest til 1.september til þess að verða við kröfum Gunnars. Ef ekki verður orðið við þeim kröfum má búast við því að hann höfði mál.
Þá fjallaði DV um skuggalegar hótanir sem bárust Þóru í kjölfar sömu umfjöllunar. Þar sagði nafnlaus Facebook-notandi að hann ætlaði að „leika sér að“ Þóru og dóttur hennar.