Af þeim tuttugu einstaklingum sem skulda Lánasjóði íslenskra námsmanna (LÍN) hæstu fjárhæðirnar, hafa átta ekki borgað krónu til baka síðastliðin níu ár.

Fréttablaðið greindi fyrst frá en upplýsingarnar má finna í nýrri ársskýrslu LÍN. Þar sést að heildarskuldir tuttugu hæstu lánþeganna nema 688,9 milljónum króna. Hópurinn hefur samtals borgað til baka 18,7 milljónir á síðustu níu árum en LÍN býst við því að fá 91,9 milljónir króna af skuldunum. Það gerir um 13,3 prósent af heildarskuldinni.

„Það þýðir um þrjátíu milljón krónur í styrk á mann. Það er einn af göllunum við núverandi námslánakerfi að styrkurinn er fyrst og fremst að fara til þeirra sem taka mjög há námslán,“ segir Jónas Friðrik Jónsson, formaður LÍN í samtali við Fréttablaðið.

Allir á listanum hafa verið við nám erlendis. Tólf einstaklingar af þessum 20 fengu lán fyrir doktorsnámi. Sem dæmi má nefna að sá sem er í þriðja sæti á listanum yfir hæstu skuldarana lauk meistaranámi árið 2003. Hann hefur ekki borgað af láninu síðastliðin níu ár.

Hrafnhildur Ásta Þorvaldsdóttir, framkvæmdastjóri LÍN, bendir á að ekki sé gengið á ábyrðarmenn nema lánið fari í vanskil. Það sé ekki raunin í umræddum málum en hægt er að fá undanþágu frá greiðslu vegna atvinnuleysis, veikinda eða ef viðkomandi hefur verið í lánsæfu námi.

Hrafnhildur segir það orðum aukið einstaklingarnir hafi fundið glufu á kerfinu. „Hins vegar er í kerfinu hvati til að vera sem lengst í námi og taka sem mest lán þegar þú ert á annað borð kominn með hátt lán. Ef þú ert kominn með lán upp á tíu til fimmtán milljónir þá borgar þú ekki meira af láninu þó þú skuldir mikið.“