Ráku á tímabili tvo Pizza 67 staði á höfuðborgarsvæðinu – Annar staðurinn boðinn til sölu á Bland.is
Skiptum í þrotabú P67 ehf., er lokið en félagið rak á sínum tíma pítsastaði undir merkjum Pizza 67, annan í Grafarvogi og hinn við Grensásveg. Ekkert fékkst upp í lýstar kröfur.
Fram kemur í Viðskiptablaðinu að lýstar kröfur hafi verið 32,3 milljónir króna. P 67 ehf. var lýst gjaldþrota þann 20.maí síðastliðinn en skiptum á þrotabúinu lauk þann 16.ágúst síðastliðinn.
Félagið opnaði Pizza 67 stað í Langarima í Grafarvogi í desember árið 2014. Félagið opnaði annan stað á Grensásvegi sumarið 2015. DV greindi frá því í desember í fyrra að fyrrum starfsmaður Pizza 67 hefði kvartað undan félaginu opinberlega vegna ógoldinna launa. Sagði hann fyrirtækið skulda sér um 950 þúsund krónur í laun. Gagnrýndi hann að fyrirtækið væri að færa út kvíarnar á meðan enn væri óuppgerðar launaskuldir við starfsfólk og sagði hann að félagið hefði þar að auki ekki greitt lífeyris né verkalýðsfélagagreiðslur.
Aðspurður sagði Anton Traustason, eigandi P67 eiga von á að afkoma fyrirtækisins myndi batna í desembermánuði og lofaði einnig að allir starfsmenn myndu fá greitt að fullu. Þá bætti hann við að að dýrt hefði verið að koma staðnum á Grensásvegi á laggirnar og því hefðu orðið tafir á skuldauppgjöri.
Þá greindi DV einnig frá því síðar í desember 2015 að veitingastaðurinn Pizza 67 í Grafarvogi hefði verið boðin til sölu á vefsíðunni Bland.is fyrir 10 milljónir króna. Höfðu þá borist fréttir um að rafmagnið hefði verið tekið af veitingastöðunum í Grafarvogi og við Grensásveg, þar sem ekki höfðu verið greiddir rafmagnsreikningar. Þá var Pizza 67 staðnum á Grensásvegi lokað um svipað leyti.