Yfirvöld í Albuquerque fóru nýja leið til að aðstoða heimilislausa
Á dögunum var liðið eitt ár síðan yfirvöld í borginni Albuquerque í Nýju-Mexíkó í Bandaríkjunum ákváðu að fara nýja leið til að aðstoða heimilislausa íbúa borgarinnar.
Ákveðið var að bjóða heimilislausum og atvinnulausum íbúum borgarinnar vinnu við að halda borginni hreinni og fínni. Það var borgarstjórinn Richard Berry sem fékk hugmyndina þegar hann sá heimilislausan einstakling í miðborginni. Sá hélt á skilti sem á stóð: „Þarf vinnu. Hvað sem er hjálpar“.
Í umfjöllun Washington Post kemur fram að í stað þess að segja manninum að finna sér vinnu hugsaði Richard með sér að mögulega væri betra að bjóða honum og öðrum í hans stöðu vinnu. Þannig hófst þessi skemmtilega tilraun og er óhætt að segja að hún hafi undið upp á sig.
Ákveðið var að bjóða heimilislausum og atvinnulausum íbúum borgarinnar starf sem miðar að því að halda borginni hreinni og fínni. Borgin ákvað að verja 50 þúsund Bandaríkjadölum til að koma verkefninu af stað og fá þeir sem uppfylla ákveðin skilyrði vinnu við að tína rusl upp af götum borgarinnar.
Borgin borgar 9 Bandaríkjadali, rétt rúmar þúsund krónur, á tímann og nú þegar hafa hátt í þúsund einstaklingar nýtt sér þetta úrræði borgaryfirvalda. Og óhætt er að segja að borgin sé hreinni fyrir vikið því á þessu ári hafa starfsmenn tínt upp tæp 32 tonn af rusli.