Lögreglan leitar nú að einum eða fleirum aðilum vegna hryllilegs máls frá því í nótt. Steypustykki var kastað af brú niður á hraðbrauð á Fjóni í Danmörku. Stykkið lenti á bíl sem var ekið eftir hraðbrautinni. Í bílnum var þriggja manna erlend fjölskylda, fólk með lítið barn sitt. Foreldrarnir slösuðust alvarlega en barnið slapp lítið meitt. Fólkið var flutt á sjúkrahús en skömmu eftir komuna þangað lést annað foreldrið og hitt er í lífshættu.
Lögreglan hefur nú beðið almenning um aðstoð og hvetur fólk til að hafa samband ef það hefur einhverjar upplýsingar um hver eða hverjir voru að verki. Fólkið ók í vestur eftir hraðbrautinni, í átt að Jótlandi. Þegar þau óku undir Langesøvej brúnna var stóru steypustykki hent niður af henni og lenti það á bíl fjölskyldunnar að sögn lögreglunnar á Fjóni.
Hraðbrautin var lokuð í nokkrar klukkustundir í nótt vegna slyssins en hefur nú verið opnuð á nýjan leik. Í fréttatilkynningu frá lögreglunni á Fjóni segir að hún hafi ákveðið að skýra strax frá málavöxtum í þeirri von að vitni gefi sig fram svo hægt verði að upplýsa þetta hræðilega mál og hafa uppi á þeim sem bera ábyrgð á því.
Lögreglan vill ekki veita upplýsingar um þjóðerni fólksins að svo stöddu þar sem ekki hefur tekist að ná sambandi við ættingja þess enn.
Þetta er ekki í fyrsta sinn sem stóry steypustykki er kastað frá þessari sömu brú. Í janúar á þessu ári var 30 kílóa steypustykki kastað á bíl, sem var ekið undir brúnna. Í bílnum var fjölskylda. Móðirin slasaðist á höfði en börnin og faðirinn sluppu ómeidd.
Svipuð mál hafa komið upp víðar í Danmörku á undanförnum árum. 2011 sluppu tveir lögreglumenn naumlega þegar tveggja kílóa steypustykki var kastað á bíl þeirra af göngubrú í Brabrand nærri Árósum. 2009 skaddaðist milta 17 ára pilts þegar steini var kastað á bíl sem hann var farþegi í. Málin eru fleiri á þessu árþúsundi en þetta er í fyrsta sinn sem banaslys hlýst af að sögn Ekstra Bladet.