,,Það var bara rosalegt að verða vitni að þessu út um gluggann hjá sér. Maður á ekki von á svona, vissi raunar ekkert hvað var í gangi í fyrstu. Maður gerði sér smám saman grein fyrir því hvað var að gerast, lögreglan út um allt og þyrla sveimandi. Mér virtist ég hafi séð manninn leggja á flótta en lögreglan hljóp hann uppi, handjárnuðu og settu inn í lögreglubílinn. Það er ennþá mikið í gangi og lögreglan er enn á vettvangi,“ segir Anna Kristín Axelsdóttir Sandholt.
Móðirin í áfalli Sjá hér
Óhuggulegt atvik átti sér stað fyrr í dag þegar bíl með 2 ára barni var stolið fyrir utan leikskóla í Kópavogi. Faðir kom að sækja annað barn á leikskólann og skildi bílinn eftir í gangi. Í bílnum var tveggja ára barn. Á meðan faðirinn sótti barn á leikskólann kom þar að maður og stal bílnum. Allt tiltækt lið lögreglu var kallað á svæðið ásamt þyrlu. Tilkynnt var um að barnsins væri saknað um klukkan 15:18.
Faðir drengsins tjáir sig í samtali við Vísi. Fjölskyldan er nýlega flutt til Reykjavíkur frá Vestmannaeyjum. Hann segir að hann muni hafa varann á í framtíðinni.
„Maður er að koma aftur í bæinn úr rólegu umhverfi þar sem maður gat leyft sér ýmislegt. Maður dregur lærdóm af þessu,“ segir faðirinn sem heitir Magnús og bætir við á öðrum stað: „Ég hringdi og tilkynnti þeim bílþjófnað og mannrán í leiðinni.“
Lögreglan handtók svo manninn og kom barninu í öruggar henndur. Í samtali við lögreglu kom fram að móðirin hefði verið skelfingu lostin.
Anna Kristín varð eins og áður segir vitni að atvikinu og segir að þetta hafi verið eins og að horfa bíómynd. „Þetta er ákveðinn lífsreynsla að verða vitni að svona atburði. Manni stendur alls ekki á sama, ég á börn og maður vissi aldrei nákvæmlega hvað var eiginlega í gangi. Atburðarásin var svo hröð að ég hef aldrei séð annað eins.“
Þá sagði Anna Kristín ennfremur:
,,Hvað dettur manni í hug þegar þyrla er sveimandi yfir blokkinni í um 30 mínútur. Gluggi einn í íbúðinni snýr út á Krónunni svo það er hægt að segja að ég hafi séð þetta í beinni. Það er svo gott og mikill léttir að þetta fór vel að lokum. Þeir fundu barnið sem var fyrir öllu.“
Þá segir Magnús, faðir drengsins einnig að um ógæfumann væri að ræða. Góðkunningja lögreglunnar. Hann þakkar lögreglunni og segir í samtali við Vísi:
„Þú vilt ekki lenda í þessu […] Þetta var kæruleysi, ég var værukær“