Þeim hefur fækkað nokkuð sem eru jákvæðir gagnvart erlendum ferðamönnum frá því í júlí í fyrra. Þannig segjast 67,7 prósent vera jákvæðor gagnvart erlendum ferðamönnum á Íslandi nú, borið saman við 80 prósent á sama tíma í fyrra.

Þetta kemur fram í niðurstöðum nýrrar könnunnar MMR sem sneri að viðhorfi Íslendinga til erlendra ferðamanna hér á landi. Spur var: „Almennt séð, hversu jákvæð(ur) eða neikvæð(ur) ert þú gagnavart erlendum ferðamönnum á Íslandi?“

Nokkur munur var á viðhorfi til erlendra ferðamanna eftir búsetu, tekjum og kyni. Þeir sem að voru búsettir á höfuðborgarsvæðinu voru líklegri til þess að vera jákvæðir gagnvart erlendum ferðamönnum á Íslandi en þeir sem voru búsettir á landsbyggðinni. Þannig sögðust 71,7 prósent þeirra sem búsett voru á höfuðborgarsvæðinu vera jákvæð gagnvart erlendum ferðamönnum á Íslandi, borið saman við 60,3 prósent þeirra sem búsett voru á landsbyggðinni.

Þeir sem höfðu hærri heimilistekjur voru frekar jákvæðir gagnvart erlendum ferðamönnum á Íslandi en þeir sem höfðu lægri heimilistekjur. Af þeim sem tóku afstöðu og tilheyrðu tekjuhæsta hópnum, milljón eða meira á mánuði í heimilistekjur, sögðust 82,8 prósent vera jákvæð gagnvart erlendum ferðamönnum, borið saman við 54,7 prósent þeirra sem tilheyrðu tekjulægsta hópnum undir 250 þúsund á mánuði í heimilistekjur.

Þeir sem studdu Pírata voru síður jákvæðir gagnvart erlendum ferðamönnum á Íslandi en stuðningsfólk annarra flokka. Þannig sögðust 64,0 prósent þeirra sem studdu Pírata vera jákvæð gagnvart erlendum ferðamönnum á Íslandi. Þeir sem sögðust styðja Samfylkinguna voru hinsvega jákvæðari gagnvart erlendum ferðamönnum á Íslandi en stuðningsfólk annarra flokka.

Þá sögðust 85,3 prósent þeirra sem studdu Samfylkinguna vera jákvæð gagnvart erlendum ferðamönnum á Íslandi.