Gæti verið að loka dyrunum að hugsanlegu ríkisstjórnarsamstarfi eftir kosningar, segir stjórnmálafræðingur
Grétar Þór Eyþórsson, prófessor í stjórnmálafræði, segir að fari svo að Framsóknarflokkurinn ætli sér að vinna til vinstri í næstu ríkisstjórn sé líklegra að stjórnarandstaðan vilji tala við Sigurð Inga Jóhannsson fremur en Sigmund Davíð Gunnlaugsson.
Sigmundur Davíð hefur látið hafa eftir sér að mikilvægt sé að ljúka þeim málum sem fyrir liggja áður en næstu kosningar fara fram – það liggi hreinlega ekkert á að ganga strax til kosninga. Sigmundur hefur talað á skjön við bæði Sigurð Inga og Bjarna Benediktsson sem báðir hafa sagt að kosið verði í haust.
„Sigmundur Davíð Gunnlaugsson sýnist mér vera að reyna að bjarga sínu pólitíska lífi og notar til þess allar aðferðir. Það er hins vegar þannig að kannski eru þau meðöl ekki best fyrir flokkinn hans. Aftur á móti sýnist mér Sigurður Ingi Jóhannsson vera á þeirri leið að hugsa um hag flokksins og efna loforðið um kosningar,“ segir Grétar Þór í viðtali í Fréttablaðinu í dag og bætir við að með ummælum sínum gæti Sigmundur Davíð verið að loka dyrunum að hugsanlegu ríkisstjórnarsamstarfi eftir kosningar.