Sautján ára gamall bandarískur piltur, sem er á ferðalagi hér á landi með fjölskyldu sinni, fannst nakinn úti á götu skammt frá miðborg Reykjavíkur aðfaranótt þriðjudags. Lögreglan á höfuðborgarsvæðinu er með málið til rannsóknar en grunur leikur á að honum hafi verið byrluð ólyfjan.
Fréttablaðið greinir frá þessu.
Þar segir að pilturinn hafi verið á kaffihúsi fyrr um kvöldið og var það leigubílstjóri sem kom auga á drenginn þar sem hann lá nakinn í götunni. Hann var fluttur á sjúkrahús. Sem fyrr segir leikur grunur á að manninum hafi verið byrluð ólyfjan en enginn er í haldi lögreglu enn sem komið er. Meðal þess sem lögregla skoðar eru upptökur úr öryggismyndavélum.
Fréttablaðið greindi í gær frá máli ungrar konu sem telur að sér hafi verið byrluð ólyfjan á skemmtistað í miðborginni aðfaranótt sunnudags.