„Þú reyndist bara vera einn þeirra sem áttir aflandseignir og komst fram í skjölunum
„Þú reyndist bara vera einn þeirra sem áttir aflandseignir og komst fram í skjölunum, og það þurfti að kanna þinn þátt þar í, rétt eins og við könnuðum þátt margra annarra auðmanna og aflandseyinga út um allan heim,“ segir píratinn Smári McCarty sem gefur lítið fyrir þær kenningar Sigmundar Davíðs Gunnlaugssonar, fyrrverandi forsætisráðherra, þess efnis að reynt hafi verið að koma höggi á hann í Panama-skjölunum.
Eyjan fjallar um þetta á vef sínum og vísar í Facebook-færslu Smára.
Sigmundur Davíð fór mikinn í viðtali hjá Útvarpi Sögu í gær þar sem hann sagði að barátta hans í „haftastríðinu“ og verðtryggingarmálinu hafi átt stóran þátt í því að reynt hafi verið að koma á hann höggi með Panama-skjölunum. Smári, sem kom að úrvinnslu gagna upp úr skjölunum, þvertekur fyrir þetta.
„Sorry Sigmundur Davíð, en hafandi unnið í Panamaskjölunum get ég staðfest að þetta var ekki á nokkurn hátt unnið þér til höfuðs,“ segir Smári. Sigmundur sagði að aðförin að sér hefði verið í undirbúningi lengi og andstæðingar hans hafi beitt þessum gögnum sem „Soros-vogunarsjóðskóngurinn“ hafi keypt. Vísaði hann þar í auðmanninn George Soros sem að vísu sjálfur kom fyrir í Panama-skjölunum.
Panama-skjölin samanstanda af 11,5 milljónum skjala sem voru í vörslu lögmannsstofunnar Mossack Fonseca í Panama. Nöfn þúsunda einstaklinga var að finna í skjölunum, þar á meðal fjölmargra Íslendinga.