Börn Ólafs og fyrrverandi eiginkona lentu í umferðarslysi á Reykjanesbraut fyrir fjórum árum – „Ríkisvaldið verður að bregðast við fljótt og vel“
„Stundum er það þannig að maður áttar sig ekki almennilega á hlutunum fyrr en þeir bíta á manns eigin skinni,“ segir Ólafur Þór Ólafsson, íbúi í Sandgerði og forseti bæjarstjórnar Sandgerðisbæjar. Ólafur vísar þarna í umferðarslys sem tvö börn hans og fyrrverandi eiginkona lentu í á Reykjanesbraut fyrir fjórum árum.
Nú stendur yfir átakið Stopp, hingað og ekki lengra, en það miðar að því að vekja athygli á mikilvægi þess að ljúka framkvæmdum við tvöföldun Reykjanesbrautar. Nú stíga fórnarlömb umferðarslysa á Reykjanesbraut fram og segja sögu sína og er sonur Ólafs einn þeirra sem birst hefur í einu af myndböndum hópsins. Myndbandið má sjá hér neðst í fréttinni.
Sjá einnig: Sesselja Erna: „Ég kastaðist úr bílstólnum og var sú eina sem lifði af“
Ólafur rifjar upp slysið á Facebook-síðu sinni, en það átti sér stað við einn afleggjarann niður í Reykjanesbæ. Bifreið sem fyrrverandi eiginkona Ólafs og tvö yngri börn þeirra voru í lenti þá í árekstri við aðra bifreið.
„Ég var lokaður inni á einhverjum fundinum með rafmagnslausan síma þegar þetta gerist og fékk vægt áfall þegar ég kom heim og fékk fréttir af fólkinu mínu inni á sjúkrahúsi eftir bílslys. Sem betur fer var lukkan í liði með börnunum og þau sluppu ómeidd en Katrín er enn í dag að fást við afleiðingarnar af þessu slysi. En það hefði svo auðveldlega getað farið mikið verr,“ segir Ólafur sem segir að við þetta slys hafi hann áttað sig á mikilvægi þess að klára framkvæmdir við Reykjanesbraut, frá Fitjum að flugstöð eins fljótt og mögulegt er.
„Það verður að fjarlægja þær dauðagildrur sem allir afleggjararnir á þeim kafla eru.“
„Það verður að fjarlægja þær dauðagildrur sem allir afleggjararnir á þeim kafla eru. Umferðarálagið á þessum kafla eykst í hlutfalli við þann fjölda ferðamanna sem sækja Ísland heim. Aukið öryggi á honum er því sameiginlegt baráttumál íbúa sveitarfélaganna þriggja vestast á Suðurnesjum og allra þeirra sem þurfa að fara til eða frá alþjóðlegum flugvelli á Miðnesheiði. Í mínum huga er þetta mikilvægasta vegaframkvæmdin fyrir íbúa í mínu sveitarfélagi í Sandgerði. Ég hef gert mitt til að koma því á framfæri þar sem ég hef starfað sem pólitískur fulltrúi bæði í stjórn Sambands sveitarfélaga á Suðurnesjum og í bæjarstjórn Sandgerðisbæjar. Á báðum stöðum hefur verið ályktað um mikilvægi úrbóta á vestasta hluta Reykjanesbrautar, síðast hjá okkur í Sandgerði þegar við fjölluðum um samgönguáætlun í apríl á þessu ári,“ segir hann.
„Nú eru Suðurnesjamenn búnir að fá nóg og dropinn sem fyllti mælinn var ömurlegt dauðaslys fyrr í sumar. Það verður ekki beðið lengur og ríkisvaldið verður að bregðast við fljótt og vel. Gunnar Freyr sonur minn er annar þeirra sem kemur fram í þessu myndbandi sem var unnið á vegum hópsins sem stendur að átakinu „Stopp, hingað og lengra“. Vonandi verður þetta litla innslag hans ásamt ákalli allra okkar sem búum hér á Suðurnesjum til þess að tvöföldun Reykjanesbrautarinnar verði kláruð sem fyrst,“ segir Ólafur en í lok myndbandsins hér að neðan tjáir sonur Ólafs sig stuttlega en auk hans kemur annar ungur drengur fyrir í myndbandinu sem einnig lenti í slysi á Reykjanesbraut.
