Jacques Hamel var vígður til prests árið 1958 – Var skorinn á háls af gíslatökumönnunum
Áttatíu og sex ára gamall prestur Gambetta-kirkjunnar nærri bænum Rouen í Frakklandi var myrtur af gíslatökumönnum sem ruddust inn í kirkjuna í morgun. Annar gísl er sagður berjast fyrir lífi sínu á sjúkrahúsi eftir að hafa verið stunginn með hnífi.
Mennirnir, sem voru tveir, eru sagðir hafa skorið prestinn á háls en þeir voru skotnir til bana af lögreglu skömmu síðar. Lögregla útilokar ekki að mennirnir tengist hryðjuverkasamtökunum ISIS.
Fimm manns, þar á meðal presturinn sem var myrtur, Jacques Hamel, voru teknir í gíslingu í kirkjunni en í kirkjunni voru einnig tvær nunnur og tveir kirkjugestir. Talið er að gíslatökumennirnir hafi afhöfðað prestinn.
Óstaðfestar fregnir herma að mennirnir hafi kallað „Daesh“ – sem er annað heiti yfir ISIS – áður en þeir ruddust inn í kirkjuna. Deild innan lögreglunnar sem rannsakar hryðjuverk hefur tekið að sér rannsókn málsins.
Jacques Hamel var vígður til prests árið 1958. Talið er að mennirnir hafi farið bakdyramegin inn í kirkjuna upp úr klukkan níu að staðartíma. Talið er að þriðja nunnan í kirkjunni hafi komist út og tókst henni að gera lögreglu viðvart. Sérsveitarmenn voru komnir á vettvang innan fárra mínútna.