Þyrla Landhelgisgæslunnar var kölluð út í dag í Þjórsársdal til að flytja fjögurra mánaða gamalt barn á Landspítalann. Lögreglan á Suðurlandi segir í samtali við DV að barnið hafi verið með forráðamönnum á tjaldsvæði og hefði heitt vatn helst yfir það.
Sjúkraflutningamenn fóru á svæðið ásamt lögreglu. Mbl greindi fyrst frá en þar segir að þyrlan hafið verið kölluð út og barnið flutt til Reykjavíkur alvarlega slasað á Landspítalann á Fossvogi.
Þá eru björgunarsveitir Slysavarnafélagsins á Suðurlandi nú að koma konu til aðstoðar sem fótbrotnaði á Vondugiljaaurum við Landmannalaugar. Hálendisvakt björgunarsveitanna í Landmannalaugum er komin að konunni og er beðið eftir liðsauka þar sem um böruburð talsverða vegalengd gæti verið að ræða.
Á sama tíma var björgunarsveit á ferð á Sprengisandi fengin til að sinna fyrstu viðbrögðum í bílveltu sunnan við Aldeyjarfoss í Bárðardal.