„Sjúklingar fara ekki í sumarfrí,“ var yfirskrift færslu sem birtist á Facebook-síðu Blóðbankans í gær en þá var auglýst eftir blóðgjöfum því blóð vantaði í öllum blóðflokkum.
Viðbrögðin létu ekki á sér standa og samkvæmt færslu á Facebook-síðu Blóðbankans í morgun komu yfir 100 manns í gær og gáfu blóð. Blóðbankinn biðlaði til landsmanna að gefa blóð í gær, hvort sem er í Reykjavík eða á Akureyri. Staðan eftir helgina var ekki góð og var bent á að mikilvægt væri að blóðsöfnun gengi vel í þessari viku fyrir verslunarmannahelgina.
Jafnan gengur verr hjá Blóðbankanum að ná í blóðgjafa þegar landsmenn eru á faraldsfæti en eftir sem áður er þörfin hjá Blóðbankanum 70 blóðgjafar á dag.
Þó að um hundrað manns hafi látið sjá sig í gær vantar enn blóð og því biðlar Blóðbankinn til fólks að koma í dag, ef það getur. „Takk kæru blóðgjafar fyrir góð viðbrögð í gær. Yfir 100 manns komu til okkar en eins og sjá má vantar ennþá blóð í öllum blóðflokkum. Brettum því upp ermi og látum gott af okkur leiða. Opið á Snorrabrautinni og á Akureyri til kl. 15:00 í dag.“