Héraðsdómur Vestfjarða hefur dæmt konu í sex mánaða fangelsi en hún var sakfelld fyrir þjófnað úr verslun Lyfju og fyrir að hafa ráðist á kynsystur sína í íþróttahúsi. Konan hefur sex sinnum áður verið sakfelld vegna refsilagabrota.

Í dómi segir að konan hafi ráðist á fórnarlambið í apríl síðastliðnum, fyrst í anddyri íþróttahússins með því að slá hana með hægri olnboga í andlit og taka hana kverkataki, og stuttu síðar, á gangi fyrir framan búningsklefa kvenna, með því að kýla hana einu hnefahöggi með hægri hendi í andlit.

Afleiðingarnar voru þær að fórnarlambið fékk mar í andlit vinstra megin, verk og eymsli yfir höfuðkúpu ofan við vinstra eyra, hrufl og bólgu á báðum vörum, rispu og roða á háls, mar á hægri upphandlegg og ofanverðan brjóstkassa vinstra megin, stirðleika og eymsli í hálshrygg, auk þess sem hliðarframtönn vinstra megin í efri kjálka brotnaði, sem og bráðabirgðatannbrú í efri kjálka.

Þá var konan jafnframt sakfelld fyrir að hafa stolið andlitskremi úr verslun Lyfju að andvirði rúmlega 6 þúsund króna.
Hæfileg refsing þótti vera fangelsi, skilorðsbúndið til þriggja ára.

Þá var konan einnig dæmd til að greiða fórnarlambi líkamsárásarinnar rúmar 400 þúsund krónur í miskabætur, auk þess sem hún mun þurfa að greiða Lyfju rúmar sex þúsund krónur vegna stuldsins, auk máls- og sakarkostnaðar.