Að minnsta kosti tveir eru látnir og fimmtán særðir eftir skotárás í Fort Myers í Flórída í nótt. Bandarískir fjölmiðlar greina frá því að þrjár skotárásir hafi verið tilkynntar en ekki liggur fyrir hvort tengsl séu á milli þeirra.

Fyrst var tilkynnt um skotárás á skemmtistaðnum Club Blu Bar and Grill í Fort Myers en skömmu síðar var tilkynnt um fleiri skothvelli í grenndinni. Að sögn lögreglu voru „fjórtán til sextán“ skotnir og eru einhverjir sagðir vera í lífshættu.

Vefútgáfa breska blaðsins Mirror greinir frá því að fjöldi unglinga hafi verið samankominn á staðnum þegar árásin var framin og að börn allt niður í þrettán ára gömul hafi orðið vitni að árásinni.

Einn hefur verið handtekinn í tengslum við málið.

Ekki liggja frekari upplýsingar fyrir.