Skýrslur norrænna leyniþjónusta sýna að færri Norðurlandabúar ganga nú til liðs við hryðjuverkasamtökin ISIS en áður. Leyniþjónustur í Noregi, Svíþjóð og Danmörku segja þetta og undir þetta tekur einn helsti sérfræðingur Norðurlandanna í málefnum hryðjuverkamanna. Eyjan greinir frá.

Í skýrslu dönsku leyniþjónustunnar, PET, var greint frá því að í apríl hafi 135 danskir ríkisborgarar í það minnsta farið til Sýrlands til að taka þátt í stríðinu. Þá segir að þeim fari fækkandi sem haldi til Sýrlands að berjast.

Það sama er uppi á teningnum í Svíþjóð, en öryggislögreglan þar í landi, Säpo segir að fjöldi sænskra ríkisborgara sem haldið hafi til Sýrlands hafi náð hámarki á árunum 2013 og 2014. Þá telur norska leyniþjónustan að mun færri munu halda til Sýrlands til að berjast, að því er fram kemur í nýútkominni skýrslu.

Þá segir Magnus Ranstorp, sérfræðingur í málefnum hryðjuverkamanna að ein af skýringunum á því að fjöldinn fari minnkandi, sé vegna þess að í upphafi hafi ISIS lokkað til sín einstaklinga sem talist hafi auðveldir. Hugsanlega atvinnulausir eða þeir sem komist hafi upp á kant við lögin.