Flugfélagið WOW air hefur fest kaup á fjórum glænýjum Airbus A321 flugvélum beint frá framleiðenda Airbus. Skúli Mogensen forstjóri og stofnandi WOW air og Fabrice Brégier forstjóri Airbus skrifuðu undir samninginn í dag á flugvélasýningunni Farnborough í Bretlandi.

Listaverð vélanna er 459,6 milljónir Bandaríkjadala, jafnvirði 55 milljarða íslenskra króna, og verða nýju flugvélarnar afhentar árð 2017 og 2018, að því er fram kemur í tilkynningu frá WOW air. Floti flugfélagsins, sem eingöngu samanstendur af Airbus flugvélum, stækkar úr 11 flugvélum í 17 á næsta ári með þessum kaupum auk annarra flugvélasamninga sem þegar hafa verið kynntir. Átta af þessum 17 vélum verða alfarið í eigu WOW air.

„Við erum ánægð með að bæta glænýjum Airbus A321 flugvélum við okkar sívaxandi flota. WOW air er að verða eitt öflugasta lággjaldaflugfélag heims og við hlökkum til að halda áfram að vaxa og dafna í samstarfi við Airbus,“ segir Skúli Mogensen, forstjóri og stofnandi WOW air, í tilkynningu.

Flugvélarnar verða notaðar í flugi bæði innan Evrópu og til Norður-Ameríku.