Jafningjalán Aktiva auðveldar neytendum að fá lánað
Í morgun opnaði Aktiva (www.aktiva.is) lánatorg á netinu sem tengir saman lántakendur og lánveitendur með einföldum hætti. Lánatorgið er byggt á svokölluðum jafningja lánveitingum (peer to peer lending) en slík lánatorg eru þekkt úti í heimi og njóta vaxandi vinsælda. Aktiva er byggt á slíkum erlendum fyrirmyndum.
„Ferlið hjá Aktiva er algjörlega gagnsætt og þurfa þeir sem sækja um lán að veita samþykki fyrir því að lánshæfismat þeirra hjá Creditinfo verði kannað. Því betra sem lánshæfismatið er því betri eru vextir lánsins og má því segja að þannig sé verðlagningin sanngjarnari en áður hefur þekkst í lánamálum hér á landi. Til að byrja með verður möguleiki að fá lán frá kr. 100.000,- og upp í kr. 500.000,-, en sú upphæð sem fæst að láni hverju sinni er háð lánshæfismati umsækjandans. Það er fljótlegt og einfalt fyrir lántakendur að sjá hversu hátt lán þeir geta fengið inni á www.aktiva.is og til þess þarf rafræn skilríki á farsíma. “, segir Andri Úlfarsson, framkvæmdastjóri Aktiva.
Með Aktiva veita lánveitendur sjálfir lánið til lántakenda og fá peninginn til baka ásamt vöxtum og eru þar með bankar teknir út sem milliliðir. Hlutverk Aktiva er að hafa umsjón með lánatorginu þar sem umsóknir lántakenda eru gerðar og lánveitendur ákveða hvaða lán þeir hafa áhuga á að fjármagna.
„Eftir að umsókn um lán hefur verið fjármögnuð fær lántakandi lánsupphæðina greidda inn á bankareikninginn sinn og gangi allt eftir ætti það öllu jafna að gerast innan sólarhrings. Allir sem nýta sér lánatorgið njóta nafnleyndar og sjáum við hjá Aktiva um að innheimta endurgreiðslu frá lántakendum og koma henni til lánveitenda. Við erum þægilegur milliliður í ferlinu því lánatorgið gerir neytendum kleift að fá lánað án þess að fara í útibú og óska þar eftir láni. Allt er þetta gert á netinu og í takt við þær breytingar sem við höfum verið að sjá tengt fjármálaþjónustu hér heima og erlendis undanfarin misseri,“ segir Andri.