Í nótt hafði lögregla tvisvar sinnum afskipti af sama manninum í miðbæ Reykjavíkur. Fyrra skiptið var um klukkan hálf tvö í nótt en þá var maðurinn handtekinn vegna þjófnaðar í matvöruverslun í miðbænum.
Hann greindi lögreglumönnum frá því að hann hefði verið svangur og því stolið sér til matar. Lögreglumenn ræddu við manninn og úr varð að þeir slepptu honum gegn því loforði að hann færi beint í háttinn.
Maðurinn virðist hafa verið þyrstur líka því skömmu síðar stal hann áfengi af veitingastað. Í framhaldinu var hann settur í steininn.
Að auki var einn maður handtekinn vegna innbrots í heimahús í miðbænum á tólfta tímanum í gærkvöld. Hann var færður í fangageymslu og verður mál hans rannsakað.