Guðni Th. Jóhannesson, sem kjörinn var forseti Íslands um liðna helgi, segir að hann geti verið með almenningi í stúkunni á leikjum íslenska liðsins í Frakklandi af þeirri ástæðu að hann er ekki enn kominn í hátt embætti.

Viðtal við Guðna á CNN í dag, og DV fjallaði um, vakti nokkra athygli en þar komu VIP-herbergi meðal annars til umfjöllunar.

Í fréttinni kom fram að á sama tíma og flestir stjórnmálamenn þiggi það með þökkum að fá sæti í VIP-stúkunni sé annað uppi á teningnum hjá nýkjörnum forseta Íslands. Þvert á móti sagðist Guðni ekki geta beðið eftir að slást í hóp íslenskra stuðningsmanna í stúkunni sem allir hafa sama markmið: Hvetja íslenska liðið til dáða.

„Af hverju ætti ég að sötra kampavín í VIP-herbergi þegar ég get gert það hvar sem er í heiminum,“ spurði Guðni fréttamann í viðtalinu. „Nei, ég ætla að vera á áhorfendapöllunum með stuðningsmönnunum og ég mun vera í landsleiðstreyjunni minni,“ segir Guðni.

Guðni, sem settur verður í embætti forseta þann 1. ágúst næstkomandi, birti eftirfarandi áréttingu á Facebook-síðu sinni.

„Kæru vinir (and see English below) smá árétting um áhorfendapalla og VIP-herbergi: Ég get verið með almenningi í stúkunni á leikjum í Frakklandi því að ég er ekki enn kominn í hátt embætti. Eftir embættistöku 1. ágúst verð ég að sjálfsögðu að sætta mig við allar siðareglur og öryggiskröfur gestgjafa þegar ég sæki viðburði á þeirra vegum. Úti í Nice náði ég að blanda þessu tvennu saman, fékk að líta inn í VIP-herbergið að leik loknum og blanda þar geði við góða gesti og gestgjafa. Hver veit nema það verði eins í París.“