Þriggja barna faðir á Akureyri vann bónusvinninginn í Víkingalottóinu síðastliðinn miðvikudag.
Í tilkynningu frá Íslenskri getspá segir að stærð Víkingalottópottsins hafi heillað hann. Því ákvað hann að kippa með sér einum miða um leið og hann keypti bensín á bílinn hjá Olís.
Á miðvikudagskvöldið sá hann á netinu að bónusvinningurinn hafi verið seldur á Akureyri og lét renna miðanum í gegnum sölukassa daginn eftir. Þá kom í ljós að hann var vinningshafinn.
Afgreiðslustúlkan varð, að hans sögn, hvít í framan þegar hún tilkynnti honum að hann hefði unnið 7,7 milljónir króna. Hann segir að að hún hafi verið í meira sjokki heldur en hann sjálfur.
Í tilkynningunni segir ennfremur að vinningshafinn ætli að nota vinninginn til að greiða niður skuldir og í aðra almenna skynsemi.