„Staðan væri önnur ef hann hefði ekki verið með hjálminn á höfðinu“
„Staðan væri önnur ef hann hefði ekki verið með hjálminn á höfðinu.“ Þetta segir Gerða Sigmarsdóttir en hún er móðir 13 ára drengs sem lenti í alvarlegu hjólreiðaslysi um helgina. Líkt og sjá má á myndunum sem fylgja fréttinni er nokkuð ljóst að hjálmur bjargaði lífi drengsins. Móðir hans vill koma þeim skilaboðum áleiðis til fólks að nota hjálminn.
Síðastliðinn sunnudag var drengurinn, Sigmar Breki, að hjóla í Bröttubrekku í Kópavogi þegar hann lenti fyrir bíl. Gerða segir í samtali við DV að þrátt fyrir að Sigmar hafi hlotið alvarlega áverka sé hann á batavegi.
Sigmar dvaldi í tvær nætur á Barnaspítala Hringsins eftir slysið en hann er brotinn á fjórum hryggjaliðum auk þess sem hann fékk heilahristing.
Gerða vill koma því á framfæri að slysið hafi ekki verið neinum að kenna. Hér að ofan má sjá myndir af hjálminum sem er mjög illa farinn eftir að Sigmar skall á jörðina.
„Staðan væri önnur ef hjálmurinn hefði ekki verið á höfðinu. Held ég geti fullyrt að hann hafi bjargað lífi Sigmars,“ segir Gerða að lokum sem vill að fólk skoða myndirnar með það í huga að slysin gera ekki boð á undan sér.