Ísland er neðst Norðurlandanna í velferðarvísitölunni The Social Progress Index og lækkar um sex sæti á milli ára. Á síðasta ári var Ísland í fjórða sæti en í ár féllum við í það tíunda. Finnar eru efstir og hækka um sex sæti á milli ára. Norðurlöndin fimm eru öll á meðal tíu efstu þjóðanna.

Byggir ekki á landsframleiðslu

Þetta kemur fram í Fréttablaðinu í dag. Vísitölunni er ætlað að horfa til annarra þátta en landsframleiðslu þegar kemur að því að mæla velferð í þjóðfélögum. Til dæmis gæðum menntunar, heilbrigðisþjónustu, umburðarlyndis og tækifæra innan samfélagsins.

Samtökin héldu ráðstefnu í Hörpu í maí sem stefnt er að að verði árlegur viðburður og nokkurs konar mótvægi við efnahagsráðstefnuna í Davos í Sviss.

Michael Green, framkvæmdastjóri The Social Progress Imperative, sem gefur út vísitöluna, segir að tvær ástæður séu fyrir því að Ísland lækkar á listanum á milli ára. Í fyrsta lagi þá eru önnur lönd á listanum að ná Íslandi. Til dæmis þegar kemur að því að tryggja öryggi einstaklinga og aðgengi að upplýsingum. Í öðru lagi er ástæðan sú að aðferðafræðinni var breytt í afmörkuðum þáttum sem breytir stöðu landsins til hins verra.