Fátt virðist geta komið í veg fyrir að Guðni Th. Jóhannesson verði næsti forseti Íslands
Guðni Th. Jóhannesson er með 44,6 prósenta fylgi til embættis forseta Íslands. Þetta er samkvæmt nýjum þjóðarpúlsi Gallup sem fjallað var um í hádegisfréttum RÚV.
Fylgi Guðna hefur minnkað nokkuð upp á síðkastið en fátt virðist geta komið í veg fyrir að hann verði næsti forseti Íslands. Kosið verður á morgun. Guðni var með 51 prósents fylgi í síðasta þjóðarpúlsi. Halla Tómasdóttir er í 2. sæti með 18,6 prósenta fylgi og Davíð Oddsson í 3. sæti með rúmlega 16 prósenta fylgi. Ekki er marktækur munur á fylgi Höllu og Davíðs.
Könnunin sem um ræðir var gerð dagana 20. til 24. júní og var úrtakið 2.901. 1.651 svaraði, eða 56,9 prósent úrtaksins. Í frétt RÚV kemur fram að Halla hafi bætt við sig töluverðu fylgi frá síðustu könnun þegar hún mældist með 12,5 prósenta fylgi. Davíð stendur hins vegar í stað.
Andri Snær Magnason mælist með tæplega 16 prósenta fylgi og stendur hann nokkurn veginn í stað frá síðustu könnun. Sturla Jónsson mælist með 2,5 prósenta fylgi en aðrir minna. Tæplega 90 prósent þeirra sem svöruðu könnuninni tóku afstöðu, en fjögur prósent sögðust ekki ætla að kjósa eða skila auðu og um sjö prósent vildu ekki gefa upp afstöðu sína eða höfðu ekki ákveðið sig.
