Guðmundur Benediktsson fór gjörsamlega af límingunum þegar Arnór Ingvi Traustason skoraði sigurmarkið gegn Austurríki á EM í gær. Tilfinningaleg viðbrögð hans láta engann ósnortinn og hafa ófáir haft orð á því að lýsing hans sé hreinlega unun á að hlusta. Einn af þeim er Baldur Ragnarsson sem hefur nú komið því kring að lýsing Guðmundar muni vera það fyrsta sem hann heyrir á hverjum morgni.
Viðbrögð Guðmundar við hinu sögufrægu marki Arnórs Ingva hafa vakið mikla athygli um heim allan, enda með eindæmum dramatísk. „Ég man ekkert hvað ég sagði. Það er erfitt að koma tilfinningum í orð. Ég fagnaði bara,“ sagði Guðmundur sjálfur í samtali við Dagbladet, einn af hinum fjölmörgu erlendu miðlum sem haft hafa samband við hann undanfarinn sólarhring.
„Gat bara ekki farið að sofa án þess að búa þetta til. Þessi frammistaða hjá honum Gumma er það yfirfull af heilindum og fegurð að ég vil vakna með hana í eyrunum á hverjum morgni,“ ritar Baldur á fésbókarsíðu sína og deilir meðfylgjandi hlekk þar sem nálgast má sérstakan vekjaratón með þessari lýsingu Guðmundar. Hefur uppátæki Baldurs vakið heilmikla lukku en áhugasamir geta hlaðið tóninum niður á snjallsíma sinn.
