Einn stuðningsmaður enska landsliðsins er sagður þungt haldinn eftir að hafa orðið fyrir líkamsárás í frönsku borginni Marseille í dag. Ráðist var á manninn í hópslagsmálum sem brutust út á milli stuðningsmanna enska landsliðsins og þess rússneska en liðin eigast við á EM í fótbolta í kvöld.

Við vekjum athygli á því að myndir sem birtast hér neðst í fréttinni kunna að vekja óhug hjá fólki.

Óeirðarlögreglan var kölluð á svæðið og hefur hún notað vatnsúðara og táragas til að hafa hemil á stuðningsmönnunum. Þetta er þriðji dagurinn í röð í Marseille sem slagsmál milli stuðningsmanna brjótast út. Í öll skiptin hafa stuðningsmenn enska landsliðsins átt hlut að máli.

Að því er fram kemur í frétt The Provence var stuðningsmanninum sem liggur þungt haldinn á sjúkrahúsi veitt fjölmörg höfuðhögg. Ástand hans er sagt alvarlegt og hann sagður vera í lífshættu.

Mail Online hefur rætt við stuðningsmenn enska liðsins í Marseille og segir þeir að stuðningsmenn rússneska liðsins hafi átt upptökin að slagsmálunum. Fjölmargir stuðningsmenn enska liðsins eru sárir eins og myndirnar með fréttinni bera með sér.