Píratar og Sjálfstæðisflokkur eru stærstu flokkar landsins og myndu tæp 32 prósent kjósa Píirata en 29,9 prósent Sjálfstæðisflokk. Þetta er samkvæmt niðurstöðum könnunar Fréttablaðsins, Stöðvar 2 og Vísi.
Vinstri grænir virðast vera í mikilli sókn, en samkvæmt könnuninni myndu tæp fjórtán prósent kjósa flokkinn. Samfylkingin og Framsóknarflokkurinn mælast með um átta prósenta fylgi hvor flokkur og Björt framtíð fjögurra prósenta.
Ef niðurstaðan yrði þessi fengju Píratar 22 þingmenn kjörna og Sjálfstæðisflokkur 21 þingmann. Vinstri grænir fengju 9 þingmenn, Samfylkingin fengi 6 þingmenn og Framsóknarflokkurinn fimm.
Grétar Þór Eyþórsson, prófessur í stjórnmálafræði við Háskólann á Akureyri, segir við Fréttablaðið að greinilegt sé að Sjálfstæðisflokkur og Vinstri grænir séu að sækja í sig veðrið. Hans kenning er sú að Vinstri grænir séu að taka fylgi frá Pírötum, en fylgi við þá hefur lækkað nokkuð að undanförnu. Þó segir Grétar að fylgi Pírata sé enn mikið og engar vísbendingar séu um að þeir séu að hrynja.