Málið í forgangi hjá lögreglu
Hættuleg og alvarleg árás átti sér stað á bílaplani Langholtsskóla í gær. Árásin er sögð tengjast eineltismáli enn úr öðrum skóla, það staðfestir Benedikt Lund lögreglufulltrúi í samtali við DV. Fórnarlambið er unglingsstúlka og gerendurnir einnig börn. Eitt af sönnunargögnum lögreglu er stutt myndskeið sem tekið var upp af árásinni.
Foreldrar fórnarlambsins hafa lagt fram kæru og barnaverndaryfirvöldum gert viðvart. Ríkisútvarpið fjallar um málið í dag.. DV greindi frá málinu í gær. Benedikt segir í samtali við dv.is:
„Þetta mál er í forgangi. Það er eins og önnur mál sem snerta unglinga, við reynum að taka þau framfyrir. Það fer í forgang og er til rannsóknar.“
Fjölmörg mál eru til rannsóknar hjá embættinu en Benedikt segir að unnið verði að því hörðum höndum að ljúka rannsókn sem fyrst. Myndband er sönnunargagn í málinu og segir Benedikt:
„Það er ekki komið inn á borð til okkar en við munum fá það. Það er búið að ganga frá því að það kemur inn á borð til okkar.“
Benedikt segir að allir sem koma að málinu séu líklega ósakhæfir. Því vilji embættið gefa litlar upplýsingar um málsatvik. Þá herma heimildir dv að stúlkan hafi slasast alvarlega.
„Þetta eru börn og viljum við ekki tjá okkur of mikið um þetta á þessu stigi málsins.“
Benedikt Lund staðfestir í samtali við dv.is að foreldrar hafi lagt fram kæru í því sem yfirvöld telja vera alvarlegt og ljótt eineltismál. Þá segir RUV að stúlkan hafi gefið sinn vitnisburð en meintir gerendur yfirheyrðir á morgun.