Guðni Th. Jóhannesson, rithöfundur og sagnfræðingur, boðaði til blaðamannafundar í Salnum í Kópavogi í dag. Þar staðfesti hann það sem allir vissu, hann ætlar í forsetaframboð. Fundarboðið eitt og sér síðastliðinn sunnudag var sterkasta vísbendingin um að Guðni ætlaði fram og eftir því sem leið á vikuna bættust fleiri við. Þannig greindi dv.is frá því að á heimasíðu ríkisskattstjóra væri að finna félag sem heitir: „Félag um forsetaframboð Guðna Th. Jóhannessonar.“
Það félag stofnaði Guðni á mánudag. Þá var Guðni spurður af hverju hann hefði valið þennan dag til að tilkynna um framboð sitt. Svaraði Guðni á þessa leið:
„Það er skemmtileg tilviljun. Það eru svo margar tilviljanir í þessu lífi,“ svarar Guðni: ,,Svo er annað, fyrsta forsetakjörið á Íslandi var 29. júní 1952 en forsetaefnin sem þá voru í framboði tilkynntu um ákvörðun sína 9. maí. Nú er þetta 25. júní og því ekki þá að hafa þetta 5. maí, alveg nákvæmlega sama frest og þá var. Ákvörðunin, hver sem hún verður, verður tilkynnt þennan dag, 5. maí. Það er margt sem kallar á að þessi dagur verði sögulegur í þessu samhengi.“
Á fundinum sagði Guðni:
„Fólkið í landinu á að finna að forsetinn sé ekki í einni fylkingu frekar en annarri en að hann verði fastur fyrir þegar á þarf að halda og leiði mál til lykta þegar þau komast í öngstræti […] Forsetinn er fyrst og fremst málsvari allra Íslendinga.“