Breskur karlmaður að nafni Douglas Barr hefur verið dæmdur í 20 ára fangelsi á Krít fyrir svívirðilegt kynferðisofbeldi gagnvart þarlendum börnum. Mun hann hafa haldið ungum fórnarlömbum sínum föngnum í kjallara þar sem hann misþyrmdi þeim.

Daily Mail greinir frá en þar kemur fram að Barr hafi flutt til Krítar ásamt eiginkonu sinni árið 2007. Mun hann hafa lifað þar í vellystingum og haldið sér uppi á bótum frá breska ríkinu.

Var hann fangelsaður í janúar á síðasta ári fyrir ölvunarakstur og fyrir að hafa ógnað manni með byssu. Munu tvær ungar stúlkur hafa stigið fram á meðan hann sat inni og sagt frá því að Barr hefði nauðgað þeim.

Fyrir dómi lét lögfræðingurinn Notis Fyllakis þau orð falla að Barr væri djöfullinn sjálfur holdi klæddur, og gersneyddur allri siðferðiskennd. Kona hans mun hafa yfirgefið landið skömmu eftir að hann var handtekinn.