Skítaleiðangur þingmanns
„Hvenær biðja þau Björn Val afsökunar?“ spyr Össur Skarphéðinsson þingmaður Samfylkingarinnar á Facebook. Þar vísar Össur í umræður sem áttu sér stað á Alþingi þann 18. mars síðastliðinn. Þar kallaði Björn Valur Gíslason, þingmaður Vinstri grænna, eftir því að Sigmundur Davíð Gunnlaugsson, fyrrverandi forsætisráðherra, myndi svara fyrir fjármál sín en þá hafði komið fram að eiginkona Sigmundar, Anna Sigurlaug Pálsdóttir, væri skráð fyrir aflandsfélagi á Bresku Jómfrúareyjunum.
Björn Valur var harðlega gagnrýndur af stjórnarliðum og talaði Frosti Sigurjónsson þingmaður Framsóknarflokksins um þingmenn lágkúrunnar. Þá sagði Gunnar Bragi Sveinsson um Björn Val í ræðustól:
„En að fara í þennan skítaleiðangur sem háttvirtur þingmaður vinstri grænna virðist leiða hér er algjörlega sorglegt og það er það sem er að gera út af við traust á Alþingi.“
Össur gerir umræðurnar að umtalsefni í tilefni skýrslu fjármálaráðherra sem hann flutti í dag. Össur segir:
„Þegar hinn ódeigi varaformaður VG, Björn Valur Gíslason, gerði aflandsreikninga skattaskálka fyrst að umræðuefni í sölum Alþingis réðust ráðherrar og þingmenn stjórnarflokkanna að honum og kölluðu hann „þingmann lágkúrunnar.““
Össur heldur áfram:
„Í dag flutti fjármálaráðherra skýrslu þar sem hann lýsti brýnni nauðsyn á að uppræta skattsvik gegnum slík félög. Síðan tók hann undir með hugmyndum sem er að finna í tillögum sem bæði Samfylkingin og VG hafa lagt fram á þinginu. – Er ekki kominn tími á að einhver biðji Björn Val afsökunar?“