Hjón á sextugsaldri höfðu heppnina með sér í lottóinu um helgina
Gleðin var allsráðandi hjá vinningshöfum helgarinnar í Lottóinu þegar þau komu til Getspár í morgun og framvísuðu miðanum sem færði þeim rúmar 48,6 skattfrjálsar milljónir í vinning.
Í tilkynningu frá Getspá kemur fram að vinningshafarnir séu hjón á sextugsaldri. Þau segjast vera dyggir lottóspilarar og kaupa miðana sína alltaf í Fjarðarkaupum í Hafnarfirði.
„Það var því mikil spenna þegar þau voru búin að lesa fréttina um að vinningsmiðinn hefði verið seldur þar, frúin fór fyrst yfir sinn miða en þar var enginn vinningur. Maðurinn fór síðan yfir sinn miða og hann var ekki lengi að koma auga á réttu tölurnar á miðanum, hjónin misstu sig úr gleði með tilheyrandi hávaða og látum og kom sonurinn hlaupandi til að athuga hvað hefði gerst og það eina sem mamma hans gat sagt í geðshræringu sinni var „pabbi vann, pabbi vann,“ segir í tilkynningunni.
Þar segir ennfremur að gleðin hafi orðið ennþá meiri þegar þau uppgötvuðu að upphæðin er skattfrjáls og ætla þau að nýta fjármálaráðgjöf sem þeim stendur til boða. Þegar þau voru spurð að því hvað þau ætli að gera við peningana sögðust þau hugsanlega fara í gott og langt sumarfrí, annað væri ekki ákveðið enda varla komin niður á jörðina ennþá.