Guðni Th. Jóhannesson mælist með 60,4 prósent samkvæmt nýrri könnun Fréttablaðsins, Stöðvar 2 og Vísis. Davíð Oddsson er með 18,5 prósent og Andri Snær Magnason 11,3 prósent. Þá er Halla Tómasdóttir með 5,9 prósent. Könnunin er sú fyrsta eftir hinn umdeilda Eyjuþátt.
Könnunin var framkvæmt á mánudagskvöld en Eyjuþáttinn var sýndur á sunnudag. Var hringt var í 919 manns. 772 svöruðu og var hlutfallið 84 prósent. 62,8 prósent svöruðu spurningunni um hvern þeir myndu kjósa.
Þáttur Eyjunnar á Stöð 2 vakti mikla athygli og því verið beðið eftir nýrri könnun með nokkurri eftirvæntingu. Davíð og Guðni tókust á svo eftir var tekið. Í umfjöllun DV í gær sagði Davíð Guðna meðal annars hlaupast undan afstöðu sinni í Icesave. Guðni vildi meina að úrslitin væru ekki ráðin og Davíðs kvaðst hafa trú á því að hann gæti unnið á.
Þá sagði Davíð á einum tímapunkti að Guðni væri staðinn að því að hlaupa burt frá sínum skoðunum og á einum stað í þættinum spurði Guðni Davíð hvort hann hefði enga sómakennd. Eftir þáttinn var mikið fjör á samfélagsmiðlum þar sem þátturinn var ræddur fram og aftur og höfðu allflestir sterkar skoðanir á framgöngu Davíðs, til lofs eða lasts.
Guðni Th. tjáir sig stuttlega við Fréttablaðið um könnunina og segir:
„Ég held mínu striki. Kynni mínar hugmyndir um embætti forseta Íslands og svo er það nú fólkið sem velur forsetann. Eitthvað er ég greinilega að gera rétt.“