Sonurinn, Isaiah, féll ofan í górillugryfju í dýragarðinum í Cincinnati í Bandaríkjunum
Foreldrar unga drengsins sem féll ofan í górillugryfju í dýragarðinum í Cincinnati í Ohio-ríki í Bandaríkjunum um helgina hafa fengið líflátshótanir vegna málsins. Starfsmenn dýragarðsins skutu silfurbaksgórilluna Harambe til dauða eftir að górillan kom auga á drenginn.
Málið hefur vakið mikla athygli og hafa sumir gagnrýnt starfsmenn dýragarðsins fyrir það hvernig þeir brugðust við. Á myndbandsupptökum má sjá Harambe nálgast unga drenginn, Isaiah, og draga hann á eftir sér. Á það hefur verið bent að Harambe hafi reynt að vernda drenginn og fælst vegna öskra frá fólki sem fylgdist með atvikinu.
Foreldrar Isaiah, Michelle Gregg og Deonne Dickerson, hafa einnig verið gagnrýnd harðlega vegna málsins og þeim verið kennt um hvernig fór. Hafa fjölmargir notendur Twitter ausið úr skálum reiði sinnar og sagt að réttast hefði verið að skjóta foreldrana en ekki górilluna.
Michelle og Deonne eiga fjögur börn saman og eiga þau yfir höfði sér ákæru vegna atviksins. Fjölmiðlar vestanhafs hafa setið fyrir þeim við heimili þeirra í Ohio, en Michelle og Deonne munu hafa hafnað háu tilboði frá ónefndri sjónvarpsstöð um viðtal.