Sjö ára drengs er saknað í Japan
Sjö ára drengs er enn saknað, tæpum þremur dögum eftir að foreldrar hans skildu hann eftir í skóglendi. Drengurinn hafði hagað sér illa, að mati foreldra hans og brugðu þeir á það ráð að refsa honum með þessum hætti.
Atvikið átti sér stað í óbyggðum Japans, á norðurhluta Hokkaido, á svæði sem skógarbirnir halda meðal annars til á. Foreldrar drengsins, sem heitir Yamato Tanooka, sögðu lögreglu í fyrstu að drengurinn hafði orðið viðskila við þá þegar fjölskyldan var í gönguferð um svæðið.
Foreldrarnir eru sagðir hafa viðurkennt í gær að hafa skilið hann eftir vísvitandi til að kenna honum lexíu. Þau hafi snúið aftur skömmu síðar en þá hafi drengurinn verið horfinn. Hafði drengurinn hagað sér illa nokkru áður, kastað grjóti í bíla og gert hróp að fólki, og því hafi þeir brugðið til þess ráðs að skilja hann eftir.
Fjölskyldan var í göngu um svæðið og tilkynntu foreldrar hans um hvarfið síðdegis á laugardag. Um 180 manns hafa tekið þátt í leitinni að drengnum sem hefur ekki borið árangur þegar þetta er skrifað.
Mitsuru Wakayama, íbúi í bænum Nanae, sem er skammt frá leitarsvæðinu segir að ekki sé óalgengt að sjá birni á svæðinu. Talsverða úrkomu gerði aðfaranótt sunnudags og óttast margir um afdrif drengsins sem er án matar og vatns.
Eðli málsins samkvæmt hefur reiði fólks í Japan beinst að foreldrum drengsins sem tóku þessa hörmlegu ákvörðun.