Vegna breytinga þarf að handflokka allan innritunarfarangur
Isavia mælist til þess að farþegar mæti á Keflavíkurflugvöll þremur klukkustundum fyrir flug dagana, 31. maí, 1. júní, 2. júní og 3. júní næstkomandi. En þessa daga verður unnið að umbótum á farangursflokkunarkerfi í flugstöðinni.
Tekinn verður í notkun nýr farangursflokkunarsalur en á meðan tengt er á milli núverandi kerfis og hinnar nýju viðbótar verður engin sjálfvirk farangursflokkun heldur þarf að handflokka allan innritunarfarangur.
Farþegar eru beðnir um að mæta fyrr til að lágmarka seinkanir á flugi á meðan á þessum framkvæmdum stendur. Núverandi farangursflokkunarkerfi verður aftengt eftir klukkan 18:00 þann 31. maí næstkomandi. Gert er ráð fyrir að hið nýja kerfi verði komið í gagnið fyrir morgunflug þann 4. júní.
Í fréttatilkynningu frá Isavia segir:
„Hið nýja kerfi hefur rúmlega tvöfalda flokkunargetu á við hið gamla og er nauðsynleg viðbót við núverandi kerfi. Í nýjum sal er auk þess mun betri vinnuaðstaða fyrir starfsfólk og nú verður unnt að þjónusta farangursgáma sem notaðir eru í breiðþotur eins og Icelandair og WOW Air eru að taka í notkun um þessar mundir. Framkvæmdir við nýjan sal hófust í nóvember á síðasta ári, stuttu eftir að flugfélögin höfðu tilkynnt um þá ákvörðun að taka breiðþoturnar í notkun. Nýbyggingin sem hýsir salinn er 3.000 fermetrar að stærð en þar af er nýi salurinn 2.100 fermetrar.“
Dagana 1.-3. júní, á meðan framkvæmdirnar standa yfir, mun Isavia bjóða farþegum án endurgjalds í fyrstu rúturnar sem leggja af stað frá Reykjavík. Þær leggja af stað klukkan 02:15. Annars vegar erum að ræða rútu Kynnisferða frá BSÍ og hins vegar rútu Grayline frá Holtagörðum.