„Við verðum ekki sögulaus flokkur,“ sagði Árni Páll Árnason, formaður Samfylkingarinnar, í eldhúsdagsumræðum á Alþingi í kvöld.

Árni Páll gerði stöðu Samfylkingarinnar meðal annars að umtalsefni í ræðu sinni, en hann mun sem kunnugt er láta af embætti formanns Samfylkingarinnar um næstu helgi. Árni Páll sagði að Samfylkingin muni mæta til leiks í haust með nýja liðsskipan en sígildan leiðarvísi. Samfylkingin sé stolt af afrekum við stjórn landsins á örlagatímum og þekki þau mistök sem gerð hafa verið.

„Þjóðin sýnir í viðhorfskönnunum að hún er óþreyjufull og vill skýra sýn á framtíðina. Fylgissveiflur eru fordæmalausar. Við skiljum skilaboðin sem okkur hafa verið send og þess vegna er þetta í síðasta sinn sem ég ávarpa ykkur sem formaður Samfylkingarinnar úr þessum ræðustól,“ sagði Árni.

„Við munum mæta til leiks í haust með nýja liðsskipan, vopnuð hinum sígilda leiðarvísi sem reynst hefur vel: Samfélagssýn norrænnar jafnaðarstefnu sem boðar ábyrgt, opið markaðshagkerfi, einstaklingsfrelsi, efnahagslegan stöðugleika og félagslegt réttlæti. Við verðum ekki sögulaus flokkur. Við erum stolt af afrekum við stjórn landsins á örlagatímum og Samfylkingin ein hefur staðið að öllum þeim ákvörðunum sem þurft hefur að taka til að koma Íslandi á réttan kjöl – hvort sem við vorum í stjórn eða stjórnarandstöðu. Við sveiflumst ekki eftir gusti tíðarandans og segjum ekki eitt í dag og annað á morgun. Við þekkjum líka þau mistök sem við höfum gert, höfum gengist við þeim og erum fyrir vikið ólíklegri en aðrir til að gera þau á nýjan leik,“ sagði Árni Páll meðal annars.