Fyrrverandi bílstjóri hjá Ferðaþjónustu fatlaðra var 29. apríl síðastliðinn sakfelldur fyrir kynferðisbrot gegn greindarskertri konu. Hann var hins vegar sýknaður af ákæru um nauðgun. Maðurinn hlaut sex mánaða skilorðsbundinn dóm auk þess sem hann var dæmdur til þess að greiða konunni 600 þúsund krónur í miskabætur.

Brotin áttu sér stað á þriggja mánaða tímabili í byrjun árs 2013, í fjögur skipti alls. Konan hélt því fram að bílstjórinn hefði káfað á henni innan og utan klæða auk þess að stinga fingri upp í leggöng hennar. Þá taldi hún einnig að maðurinn hefði nauðgað henni. Maðurinn var einn með konunni í bílnum þegar brotin áttu sér stað en frásagnir vitna, aðallega starfsfólks sambýlis sem konan dvelst á, studdu framburð hennar.

Þannig sögðu sérfræðingar að konan gæti ekki skáldað slíka frásögn og hvað þá endurtekið hana nánast óbreytta. Varðandi kynferðisbrotin var framburður hennar afar staðfastur. Aðeins varðandi hina meintu nauðgun var framburður hennar á reiki auk þess sem skoðun kvensjúkdómalæknis leiddi í ljós að meyjarhaft hennar var órofið og því útilokað að getnaðarlim hefði verið stungið inn í leggöng konunnar. Hins vegar væri ekki hægt að útiloka að fingri hefði verið stungið inn í þau.

Maðurinn neitaði sök en framburður hans var metinn ótrúverðugur. Hann kvaðst ekki hafa haft neinar upplýsingar um fötlun konunnar en sérfræðingar héldu því fram að enga sérstaka kunnáttu þyrfti til þess að átta sig á henni. Meðal annars neitaði hann því að hafa kallað konuna „gullmolann sinn“ en vitni heyrðu hann viðhafa þau orð. Bílstjórinn hafði ekki áður komið við sögu lögreglu.