Um helmingurinn af íbúum bæjarins Pailin í Kambódíu eiga sér vægast sagt vafasama fortíð en þeir voru liðsmenn Rauðu khmeranna, sveita Pol Pots sem stóðu fyrir einu hryllilegasta þjóðarmorði sögunnar í lok áttunda áratugarins. 1,7 milljónir manna, eða fjórðungur landsmanna, lét lífið í tíð ógnarstjórnar Pol Pots.
Fæstir þessara íbúa Pailin, sem eiga sér svona blóðuga fortíð, eiga á hættu að hinn langi armur laganna muni ná til þeirra. Sárafáir liðsmenn Rauðu khmeranna hafa þurft að svara til saka fyrir ódæðisverk sín en hinir fara frjálsu höfði í Kambódíu og lifa lífi sínu. Flestir þeirra búa í landamærabænum Pailin sem er ekki að ástæðulausu nefndur Bær morðingjanna.
Í litlu timburhúsi í útjaðri bæjarins býr Meas Muth. Flestir bæjarbúa vita hver hann er. Hann var yfirmaður sjóhers Kambódíu á valdatíma Rauðu khmeranna. Ákæra hefur verið gefin út á hendur honum fyrir alþjóðlegum stríðsglæpadómstól fyrir þátt hans í þjóðarmorðinu. Hann er meðal annars ákærður fyrir glæpi gegn mannkyni, pyntingar, ofsóknir, mannrán, þrælahald, nauðungarhjónabönd, nauðganir, morð af yfirlögðu ráði og fjöldamorð og það mikilvægasta: Þjóðarmorð.
En hann hefur ekki verið handtekinn og mætir ekki fyrir dóm þegar hann er kallaður þangað. Hann heldur sig aðallega í húsinu sínu og situr oft á veröndinni og reykir.
Ekki langt frá húsi Meas Muth er landareign Ieng Sarys. Hann var einnig ákærður fyrir þjóðarmorð en þegar hann lést 2014 hafði hann ekki hlotið dóm. Sömu sögu er að segja af eiginkonu hans, Ieng Tirith, en þessi háværa litla kona var félagsmálaráðherra í stjórnartíð Rauðu khmeranna. Þegar hún lést á síðasta ári fylgdu mörg þúsund bæjarbúar henni til grafar.
Nuon Chea á einnig hús í nágrenninu. Hann var næstráðandinn í Rauðu khmerunun, aðeins Pol Pot var hærra settur. Pol Pot var aldrei færður fyrir dóm vegna brota sinna en hann lést 1998. Nuon Chea er enn á líf að sögn Danska ríkisútvarpsins, hann er kallaður Bróðir númer tvö.
Hann er þó ekki í húsinu sínu því hann situr í gæsluvarðhaldi. Það sama á við um Bróðir númer þrjú, þann þriðja hæst setta í hreyfingunni, Khieu Samphan en hann var forseti á meðan ógnarstjórnin var við völd.
Það er fyrst núna, 37 árum eftir að Rauðu khmerarnir hrökktust frá völdum, að byrjað er að draga þá fyrir dóm. Eftir þjóðarmorðið sömdu khmerarnir við ríkisstjórnina sem var langþreytt eftir borgarastríðið. Ríkisstjórnin bauð khmerunum friðhelgi ef þeir legðu niður vopn.
Það gerðu þeir og í þakklætisskyni lét ríkisstjórnin þeim eftir landssvæði þar sem þeir gátu reist sinni eigin bæ þar sem þeir fóru með fulla stjórn. Þannig varð Pailin til. Um helmingur íbúanna 70.000 eru fyrrum liðsmenn Rauðu khmeranna, þar á meðal stjórnmálamenn, kaupsýslumenn, lögreglustjórinn, ferðamálastjórinn og góður hluti af mektarborgurum bæjarins.
Velkomin(n) til Pailin: Bæjar morðingjanna.