Hraustustu Íslendingarnir flykkjast til Madrídar
Margt af sterkasta fólki landsins er nú í óða önn að koma sér fyrir í Madríd, höfuðborg Spánar, þar sem hið svokallaða Meridian Regionals – Evrópu- og Afríkumótið í CrossFit – fer fram um helgina.
Á meðal íslenskra keppenda á mótinu eru þekktar stjörnur í CrossFit-heiminum og nægir þar að nefna tvöfaldan heimsmeistara í íþróttinni, Annie Mist Þórisdóttur, Ragnheiði Söru Sigmundsdóttir – sem hafnaði í þriðja sæti á síðustu heimsleikum – og Björgvin Karl Guðmundsson, sem hirti þriðja sætið í karlaflokki á heimsleikunum í Carson í Kaliforníu síðastliðið sumar. Þá er einnig nokkur fjöldi af öðrum íslenskum heljarmennum í Madríd, sem ætla sér stóra hluti á mótinu um helgina.
„Mér líst bara vel á þetta,” svaraði Sigurður Hafsteinn Jónsson, sem æfir hjá CrossFit XY í Garðabæ, þegar DV tók hann tali í Caja Mágica-höllinni í Madríd. Hann keppir á mótinu sem einstaklingur og leist vel á flestar æfingarnar. „Ég er búinn að renna í gegnum þetta hundrað sinnum og er klár í slaginn.”
Alls taka 28 Íslendingar þátt í mótinu um helgina. Þrjár CrossFit-stöðvar senda lið til þess að keppa fyrir sína hönd í liðakeppninni, CrossFit Reykjavík, CrossFit XY og CrossFit Sport í Sporthúsinu. Þá keppa Íslendingarnir Oddrún Eik Gylfadóttir og Eiríkur Baldursson með liði CrossFit Copenhagen. Þá munu Björk Óðinsdóttir og Númi Katrínarson keppa hvort fyrir sitt liðið frá CrossFit Nordic í Stokkhólmi.
Auk þeirra Íslendinga sem þegar hafa verið upptaldir, keppa í einstaklingskeppninni Þuríður Erla Helgadóttir frá CrossFit Sport og Hinrik Ingi Óskarsson frá CrossFit Reykjavík. Þá keppir Frederik Aegidius, danskur kærasti Anniear Mist, undir íslenskum fána CrossFit Reykjavík.
Aðspurð hvaða hluti hún ætlaði sér á mótinu um helgina, svaraði Þuríður Erla stutt og laggott: „Ég ætla að vinna!”