„Morgunljóst“ að leiguverð muni snarhækka
Vilhjálmur Birgisson formaður Verkalýðsfélags Akraness segir í Fésbókarfærslu það vera „morgunljóst“ að leiguverð muni hækka í kjölfar sölu á 450 íbúðum til leigufélags í rekstri GAMMA og vill fá að vita hverjir nákvæmlega það eru sem standa að þessum leigufélögum.
„Veit almenningur t.d. að þegar leigufélagið Heimavellir keypti eignir af Íbúðalánasjóði þá hækkaði leiguverð um 21% árið 2015 á meðan vísitala leiguverðs hækkaði um 7%? Það liggur fyrir að þessi mikla hækkun á leiguverði hjá leigufélaginu Heimavöllum varð m.a. vegna þess að verið var að endurnýja leigusamninga vegna íbúða sem félagið keypti af Íbúðalánasjóði!,“
segir Vilhjálmur. Hann segir þennan mikla vöxt leigufélaga leiða til snarhækkandi leiguverðs á Íslandi og það á kostnað þeirra tekjulægstu í samfélaginu:
„Þessu til viðbótar þá leiðir þessi hækkun á leiguverði til aukinnar verðbólgu enda er verðbólgan án húsnæðisliðar einungis 0,3%, en með húsnæðisliðnum er hún 1,7%.
Ég myndi vilja fá að vita nákvæmlega hverjir það eru sem standa að þessum leigufélögum og einnig nákvæmar upplýsingar um umfang og aðkomu lífeyrissjóðanna í þessu braski.“