Samfylkingin nýtur aðeins 6,1 prósents fylgis samkvæmt nýrri könnun Fréttablaðsins, Stöðvar 2 og Vísis. Samkvæmt niðurstöðunum halda vandræði Samfylkingar, Framsóknarflokks og Bjartrar framtíðar áfram, en 2,5 prósent segja myndu kjósa Bjarta framtíð en 7,3 prósent Framsóknarflokkinn. Ekki er marktækur munur milli Samfylkingar og Framsóknarflokks.
Fjallað er um niðurstöðurnar í Fréttablaðinu
Þessir þrír flokkar fengu samtals 34 þingmenn í síðustu kosningum; Framsókn 19, Samfylking 9 og Björt framtíð 6. Yrði niðurstaðan þessi fengi Framsóknarflokkurinn fimm þingmenn, Samfylkingin fjóra en Björt framtíð næði ekki inn manni.
Könnunin var þannig framkvæmd að hringt var í 1.080 þar til náðist í 800 manns samkvæmt lagskiptu úrtaki dagana 23. og 24. maí. Svarhlutfallið var 74,1 prósent. Alls tóku 67 prósent þeirra sem náðist í afstöðu til spurningarinnar.
Samkvæmt niðurstöðunum myndi rúm átján prósent kjósenda kjósa VG. Sjálfstæðisflokkurinn og Píratar eru sem fyrr stærstu flokkarnir og segjast tæp 32 prósent myndu kjósa Sjálfstæðisflokkinn en tæp 29 prósent Pírata. Tekið er fram að munurinn á fylgi þessara tveggja flokka er ekki tölfræðilega marktækur.
