Fyrrverandi forstjóri Milestone kominn á Kvíabryggju vegna dóms sem hann hlaut í Hæstarétti
Guðmundur Ólason, fyrrverandi forstjóri fjárfestingafélagsins Milestone, hefur hafið afplánun vegna dóms sem hann hlaut í Hæstarétti í Milestone-málinu í lok apríl. Var hann dæmdur í þriggja ára fangelsi og afplánar nú, samkvæmt heimildum DV, á Kvíabryggju.
Guðmundur var ásamt bræðrunum Karli og Steingrími Wernerssonum ákærður fyrir að hafa látið Milestone fjármagna kaup bræðranna á hlutafé systur þeirra, Ingunnar, í félaginu. Samkvæmt ákærunni var það með öllu óvíst hvenær eða með hvaða hætti Milestone fengi fjármunina til baka. Guðmundur hætti síðasta sumar störfum í fyrirtækjaráðgjöf MP banka. Tók hann þá við starfi forstjóra orkufyrirtækisins Arctic Green Energy China, áður Orka Energy. Hann hefur nú látið af því starfi og sagt sig úr stjórn Arctic Green Energy.