Spáð er hlýjum suðlægum áttum næstu dagana og gæti hitinn þannig náð um tuttugu stigum á norðausturlandi um helgina.
Á vef Veðurstofunnar kemur fram að enn sé þónokkur snjór í fjöllum, einkum um landið norðan- og austanvert. Í þeim hlýindum sem verða má búast við talsverðri leysingu. „Samfara hlýindunum verður drjúg rigning með köflum á vesturhelmingi landsins. Búast má við vexti í ám og lækjum af þessum sökum fram á helgina og eru vegfarendur hvattir til að sýna sérstaka gát við ár,“ segir á vef Veðurstofunnar.
Veðurstofan gerir ráð fyrir stífri suðvestanátt í dag, jafnvel stormi norðvestanlands fram eftir degi. Þá verður súld eða rigning, en að mestu þurrt á Norðaustur- og Austurlandi. „Hlýtt í veðri, hiti allt að 20 stig austanlands. Sunnanátt á morgun, hvassast og blautast vestantil, en þurrast á norðaustanverðu landinu þar sem hámarskhiti nær líklega 20 stigum. Léttskýjað fyrir norðan og austan á laugardag, en dregur úr úrkomu vestanlands. Hiti breytist lítið, áfram hlýjast á Norður- og Austurlandi,“ segir um veðrið næstu daga á vef Veðurstofunnar.