Guðna Th. Jóhannesson mælist með 65 prósenta fylgi samkvæmt nýrri könnun fréttastofu 365. Á meðan sögðust tæplega 20 prósent þáttakenda ætla að kjósa Davíð Oddsson í embætti forseta Íslands.
Fram kemur á Vísi að 67 prósent þáttakenda hafi svarað spurningunni um hvern þeir myndu kjósa ef gengið væri til kosninga á morgun, en alls náðist í 800 manns vegna könnunarinnar.
Andri Snær Magnason fylgir á eftir Davíð en 8 prósent þáttakenda sögðu að þeir myndu kjósa hann. Þar á eftir kemur Halla Tómasdóttir með 2,5 prósent og lokst mælist Sturla Jónsson með 1,7 prósent. Minna en 2,7 prósent þáttakenda nefndu aðra frambjóðendur.
„Ég held að það sé einhver skekkja í þessu og bind vonir við það. Ég hef byggt á því að fá eitt prósent á dag og það hefur gengið eftir fyrir utan þessa könnun núna,“ sagði Davíð Oddsson þegar hann var inntur eftir viðbrögðum við þessum niðurstöðum. Á meðan minnti Guðni Th. Jóhannesson á að „þessar kannanir kæmu nú hver á fætur annarri“ en sem betur fer gæfist tími inn á milli til þess að hitta fólk og fara á fundi. „En það er enn langt til kjördags og ég held mínu striki en ég sýti það ekki að fólkið í landinu er á þessari skoðun.“