Hæstiréttur staðfesti á mánudag nálgunarbann yfir manni sem grunaður er um að hafa beitt eiginkonu sína miklu ofbeldi; andlegu, líkamlegu og kynferðislegu. Konan hefur ítrekað kært manninn fyrir grófar árásir. Bannið gildir í sex mánuði. Á þeim tíma má maðurinn ekki koma í námunda við dvalarstað konunnar; í Kvennaathvarfið í Reykjavík eða lögheimili hennar. Hann má ekki veita henni eftirför, nálgast hana á almannafæri eða setja sig í samband við hana með einum eða öðrum hætti. Brotin ná aftur til ársins 2007.