„Mistök eru til þess að læra af þeim“
„Það er alveg á hreinu að þetta hefði getað farið miklu verr, það hefði getað verið ég eða einhver annar sem hefði borðað batteríið,“ segir Hildur Dís Kristjánsdóttir en hún lenti í óskemmtilegu reynslu fyrr í mánuðinum þegar hún keypti kókoskúlu í bakaríi í Hafnafirði handa tveggja ára syni sínum en kom þá í ljós að í kúlunni leyndist hnapprafhlaða. Hildur er ósátt við viðbrögð eiganda bakarísins við málinu en vill þó fyrst og fremst vekja athygli á frásögninni í því skyni að hún geti orðið öðrum víti til varnaðar.
Í samtali við DV.is segir Hildur að það hafi verið mikil heppni að hafi séð aðskotahlutinn áður en hún gaf syni sínum kókoskúluna þar sem þau voru í bílnum á leiðinni frá umræddu bakaríi. Hafði hún í framhaldinu samband við eiganda bakarísins. „Hann sagðist halda að þetta væri batterí sem er sett í takkann sem er ýtt á til að skipta um númer, eða þá að batteríið hefði einhvern veginn lent ofan í fötu sem afgangar eru settir í, semsagt afgangar sem eru notaðir í kókoskúlurna,“ segir hún.
Hildur kveðst jafnframt hafa tilkynnt um atvikið til Heilbrigðiseftirlitsins. Hún segir viðbrögð eigandans sjálfs ekki ásættanleg, en hann hafi boðið henni gjafabréf í sárabætur og jafnframt tjáð henni að „sjálfur fengi hann oft hár í matinn en ekki hefði ekki fengið neitt í staðinn.“
Fram kom í grein Morgunblaðsins í fyrra að rafhlöður af þessu tagi megi finna í fjarstýringum og raftækjum, sem og leiktækjum fyrir eldri börn en börn undir þriggja ára aldri eru þó í mestri hættu að lenda í slysum vegna þeirra. Samkvæmt Herdísi L. Storgaard, framkvæmdastjóra Miðstöðvar slysavarna barna eru rafhlöðurnar eitt það hættulegasta sem finnst á heimilinu þegar kemur að eiturefnum, ásamt þvottaefni fyrir uppþvottavélar.
Nokkur dauðsföll hafa orðið hjá börnum annars staðar í heiminum á síðustu árum vegna rafhlaðanna en í hættulegustu dæmunum getur rafhlaðan fest sig í vélinda eða maga barns þannig að brunasár myndast og komið getur gat á viðkomandi líffæri með skelfilegum afleiðingum.
„Þetta er náttúrulega mistök og mistök eru til þess að læra af þeim,“ segir Hildur jafnframt en hún tjáði sig um atvikið á Facebook síðu sinni á sögunum auk þess sem móðir hennar, Katrín Sveinsdóttir birti færslu um atvikið fyrr í dag.
Hildur starfar sem hjúkrunarfræðingur á gjörgæsludeild og er því vel kunnug um þær hættur sem fylgja rafhlöðum, og þá sérstaklega hnapprafhlöðum. Þær hafa á seinustu árum eru orðið æ algengari á heimilum, og eru stórhættulegar börnum. Hildur bætir við að með færslu sinni hafi hún fyrst og fremst viljað vekja fólk til umhugsunar og hvetja einstaklinga til að vera á varðbergi. En ljóst er að þarna hefði getað farið mjög illa.
„Ef þetta gerist í einu bakaríi, að þessi batterí eru á stað þar sem þau komast í mat, þá getur það alveg eins gerst í öðrum bakaríum, það er alveg á hreinu,“ segir hún en hún kveðst vonast til þess að Heilbrigðiseftirlitið grípi í málið og komið verði í veg fyrir fleiri slys af þessu tagi.
